Տեսանկյուն Տեսանկյուն

Տավուշի մարզի անկախ լրատվական

Իջեւանում ՏՏ ոլորտի մասնագետներ կպատրաստվեն


Գյումրիի տեղեկատվական տեխնոլոգիաների կենտրոնը, Տավուշի մարզպետարանը, Երեւանի պետական համալսարանի Իջեւանի մասնաճյուղը եռակողմ հուշագիր են ստորագրել, որի շրջանակում ապրիլի 1-ից ԵՊՀ Իջեւանի մասնաճյուղում կմեկնարկեն տեխնոլոգիական ոլորտի կրթական ծրագրեր:  Ծրագրի նպատակն է նպաստել Տավուշի մարզում ՏՏ  ոլորտի զարգացմանը, աջակցել ոլորտում աշխատող երիտասարդների գործունեության զարգացմանը:  Հայ օգնության ֆոնդի կողմից համաֆինանսավորվող ծրագրով Իջեւանում կանցկացվեն 8 ամիս տեւողությամբ դասընթացներ: Մարտի 15-ին Տավուշի մարզպետարանում այդ առթիվ կայացավ մամուլի ասուլիս: Տավուշի մարզպետ Հայկ  Չոբանյանը կարեւորեց տեղեկատվական տեխնոլոգիաների դերը, նշելով, որ Տավուշի մարզում 40 «Արմաթ»  լաբորատորիա կա, մեկ տարվա ընթացքում մարզի բոլոր համայնքներում կգործեն նման լաբորատորիաներ, «Թումո» կենտրոն է  գործում Դիլիջանում, Կողբում այդ կենտրոնի շինարարությունն ընթացքի մեջ է: Գյումրիի տեղեկատվական տեխնոլոգիաների կենտրոնի գործադիր տնօրեն Ամալյա Եղոյանն ասաց, որ իր երազանքն իրականություն է դառնում, երբ երիտասարդները մասնագիտություն ձեռք բերելու համար Երեւան կամ արտերկիր չեն մեկնում,  սովորում են իրենց քաղաքում: Նա ասաց, որ Հայկ Չոբանյանի Տավուշի մարզպետ նշանակվելուց հետո վստահություն առաջացավ, որ ծրագիրը Տավուշում հաջողությամբ կիրականացվի: Ծրագիրը ողջունեց նաեւ ԱԺ պատգամավոր Սոֆյա Հովսեփյանը: ԵՊՀ Իջեւանի մասնաճյուղի տնօրեն Արտակ Ցուցուլյանը նշեց, որ ԵՊՀ Իջեւանի մասնաճյուղը 25 տարեկան  է, կրթօջախի սաներն աշխատաշուկայում մրցունակ են :  Ամալյա Եղոյանին հարց տվեցինք՝    մասնակից երիտասարդները  դասընթացի ավարտին Հայաստանի ՏՏ ոլորտի առաջատար  ընկերություններում աշխատանքի կընդունվե՞ն: Նա ասաց, որ դասընթացները կանցկացնեն այդ ընկերությունների մասնագետները,  ավարտից հետո մասնակիցները համապատասխան վկայական ստանալով՝  կաշխատեն նշված ընկերություններում: Դասընթացների մասնակիցների ընտրությունը կկատարվի հարցազրույցով, դիմելու վերջնաժամկետը մարտի 25-ն է՝ ներառյալ:

Հրապարակվել է։ 12:32 18/03/2019