+374-44-43-13-37

Տեսանկյուն Տեսանկյուն

Տավուշի մարզի անկախ լրատվական

Factor.am ․Ռուսաստանից Հայաստան երկու դի է տեղափոխվել. մահվան պատճառ նշվում է կորանավիրուսը

Factor.am-ի տեղեկություններով՝ մի քանի օր առաջ Ռուսաստանի Դաշնությունից Հայաստան մահացած քաղաքացիների են տեղափոխել, որոնց մահվան պատճառը եղել է նոր տեսակի կորոնավիրուսը:

Փակ աղբյուրի փոխանցմամբ` հանգուցյալները ծնունդով եղել են Տավուշի մարզի Պառավաքար և Նավուր համայնքներից: Պառավաքարի վարչական ղեկավար Ռոլանդ Մարգարյանը Factor.am-ի հետ զրույցում հաստատեց, որ օրերս ՌԴ-ից իրենց մահացած համագյուղացու դին տեղափոխվել է գյուղ, սակայն հրաժարվեց այլ մանրամասներ փոխանցել: «Հա, բերել են, թաղումը եղել է: Ես չեմ կարող ասել, թե ինչից է մահացել: Մի տասը օր առաջ են բերել: Երիտասարդ էր»,- ասաց նա: Իսկ ահա Տավուշի մարզի Նավուրի վարչական ղեկավար Արամ Նիգոյանը Factor.am-ի հետ զրույցում ասաց, որ հանգուցյալին համայնք տեղափոխել են մայիսի 6-ին կամ 7-ին:

Նիգոյանի փոխանցմամբ՝ մահացածը 46 տարեկան է եղել, նախկինում որևէ առողջական խնդիր չի ունեցել: Գյուղապետը ևս տեղեկություն է լսել, որ համագյուղացին կորոնավիրուսից է մահացել: «46 տարեկան էր, ոչ մի խնդիր էլ չուներ, առողջ տղա էր։

Մեր լսելով՝ կորանավիրուս էր, բայց իր թղթերի մեջ, մահվան վկայականի մեջ թոքաբորբ է նշված»,- ասաց նա: Ի դեպ, Նավուրի վարչական ղեկավարը  տեղյակ էր նաև Պառավաքարի մահացած բնակչի մասին «Իրար հետ չեն եղել։

Մի քանի օրվա տարբերությամբ են բերել։ Մենք ավելի շուտ ենք բերել, քան իրանք։ Գյուղում դեպքեր չկան: Հանգուցյալի ընտանիքը դրսում է ապրում, 5 տարի առաջ են գնացել, Մոսկվայում էին»,- ասաց նա։

Արամ Նիգոյանը, խոսելով իր համագյուղացու մահվան մասին, ասաց, որ գյուղում ևս կասկած են ունեցել, որ մահվան պատճառը կորոնավիրուսն է եղել, ուստի նրան հուղարկավորել են տեղափոխելուց անմիջապես հետո:

«Դագաղը փակ էր։ Եթե թողեին էլ, խի՞ պիտի բացեինք, եթե կասկածելի բան կար։ Երևանից բերել, միանգամից հուղարկավորել ենք։ Ոչ տանն ենք դրել, ոչ սրահում: Մենք ենք այդպես ուզել, գիտես, որ կորոնավիրուսը վտանգավոր է»,- եզրափակեց նա:

 

Հրապարակվել է։ 14:33 21/05/2020