Տեսանկյուն

Տավուշի Մարզի Անկախ Լրատվական

Սահմանամերձ Նոյեմբերյանում փոքր-ինչ ուշացումով տոնվեց թատրոնի միջազգային օրը

Ապրիլի 9-ին Նոյեմբերյանի մշակույթի կենտրոնում նշվեց թատրոնի միջազգային օրը: Թատրոնի միջազգային օրը մարտի 27-ին է նշվում, սակայն որոշ խնդիրների պատճառով այն ուշացումով տոնվեց: Ներկայացվեց Նոյեմբերյանի թատրոնի անցած ուղին, այն 1969թ. արժանացել է ժողովրդականի կոչման: Նոյեմբերյանում թատրոնի կայացման գործում մեծ դեր ունեն Արծրուն Հարությունյանը, Սամվել Բեգլարյանը, Հարություն Հարությունյանը, Ասպուրակ Ալեքսանյանը եւ բազում ուրիշներ: Բեմում Նոյեմբերյանի ժողովրդական թատրոնի տարբեր տարիների ազդագրերն էին, մշակույթի կենտրոնի պատին ցուցադրվում էին թատերախմբի ներկայացումներից տեսարաններ: Բեմադրվեց մեծ հատված Սամվել Բեգլարյանի հեղինակած «Կյանքն ինչպես որ կա» ներկայացումից: Օրվա առթիվ խոսք ասացին Նոյեմբերյանի շրջխորհրդի գործկոմի մշակույթի բաժնի երկարամյա ղեկավար, թատրոնի կայացման գործում ավանդ ունեցած Արծրուն Հարությունյանը, ժողովրդական վարպետ, քանդակագործ Արմեն Գոգինյանը, դերասանուհի Ինեսա Ասատրյանը, Նոյեմբերյան համայնքի հոգեւոր հովիվ Տեր Սմբատ քահանա Աբրահամյանը եւ ուրիշներ: Հեռախոսով միջոցառումը, սահմանամերձ Նոյեմբերյանում թատերական կյանքի աշխուժությունը ողջունեց ՀՀ մշակույթի նախարարության աշխատակազմի ժամանակակից արվեստի վարչության գլխավոր մասնագետ Նաիրա Հայրապետյանը: Նա ընթերցեց ռեժիսոր, դերասան Սամվել Բեգլարյանին՝ որպես թատերական գործչի, մշակույթի նախարարության ոսկե մեդալով պարգեւատրելու մասին տեղեկատվությունը: Նախարարութան ոսկե մեդալը հանձնեց Նոյեմբերյան համայնքի ղեկավար Կարեն Աբազյանը: ՀՀ գրողների միության Տավուշի մարզային մասնաճյուղի ղեկավար Սամվել Բեգլարյանը նախկինում մշակույթի նախարարության ոսկե մեդալին էր արժանացել որպես գրող: Նոյեմբերյան համայնքի ղեկավարի օգնական Արմեն Ամիրաղյանը Նոյեմբերյանի թատրոնի մի խումբ դերասանների հանձնեց քաղաքապետարանի շնորհավորագրեր, իսկ երկարամյա շնորհալի դերասանուհի Նաիրա Աբրահամյանին` պատվոգիր: Նոյեմբերյանի մշակույթի կենտրոնի տնօրեն Սոնյա Զուրաբյանը հայտարարեց, որ թատերական կյանքը սահմանամերձ Նոյեմբերյանում աշխույժ է ,քաղաքի մշակույթի կենտրոնում գործում է ժողովրդական թատրոն, մանկապատանեկան թատրոն, երիտասարդ, խոստումնալից ռեժիսոր Վահե Հովհաննիսյանի հիմնած մանկական թատերական ստուդիան: Տոնական միջոցառման ավարտին մշակույթի կենտրոնի նախասրահում թատրոնի միջազգային օրվան նվիրված տորթ կտրվեց, ուսուցչուհի Աննա Նիյազյանը գեղեցիկ երգ կատարեց, հնչեցին օրվա խորհրդին հարիր կենաց –բարեմաղթանքներ: Ոսկան ՍԱՐԳՍՅԱՆ

Հրապարակվել է։ 00:00 10/04/2018

Մեկնաբանություններ (0)

Առայժմ մեկնաբանություններ չկան

© 2017 - Բոլոր իրավունքները պաշտպանված են: Tesankyun.am կայքի նյութերի օգտագործումն առանց հղման արգելվում է: Նյութի ամբողջական հրապարակումը արգելվում է։ Հրապարակման հեղինակի կարծիքը ոչ միշտ է համընկնում խմբագրության կարծիքի հետ: Գովազդների բովանդակության համար պատասխանատվությունը գովազդատուներինն է:
E-mail: [email protected]
© ՇՈՂԱՐՁԱԿ ՍՊԸ.
Support by CREATEIT.AM