Հայաստանի Հանրապետություն 100



Տեսանկյուն

Տավուշի Մարզի Անկախ Լրատվական

Սարիգյուղի դպրոցի «ռմբակոծված» դասասենյակներն ու 27 հազար դրամի հույսին մնացած հավաքարարները

Նախկինում հայտնել ենք, որ ՀՀ ֆինանսների ու կրթության եւ գիտության նախարարությունների կողմից համատեղ նամակ է ուղարկվել Տավուշի մարզի հանրակրթական դպրոցներ, դպրոցների տնօրեններին հայտնվել է ոչ մանկավարժական հաստիքների առավելագույն քանակի մասին: Իջեւանի տարածաշրջանի Սարիգյուղի միջնակարգ դպրոցի մի խումբ աշխատակիցներ, որոնք դպրոցի տնօրենի կողմից զգուշացվել են աշխատանքից ազատվելու կամ իրենց դրույքաչափի մասնակի կրճատման մասին, բողոքել են տողերիս հեղինակին, հրավիրելով դպրոց: Այսօր` հունվարի 25-ին եղանք Սարիգյուղի դպրոցում, հանդիպեցինք տնօրեն Լուիզա Ռեւազյանին եւ բողոքող աշխատողներին: Լ. Ռեւազյանը հայտնեց, որ 202 աշակերտ ունեցող Սարիգյուղի միջնակարգ դպրոցի ոչ մանկավարժական 12.9 հաստիքից մնալու է 9.5-ը: Սարիգյուղի դպրոցի 3 հավաքարարները հայտնեցին, որ նախկինում, հարկային պահումներից հետո, ստացել են ամսական 47 հազար դրամ աշխատավարձ, իրենց հաստիքի կրճատման հետեւանքով պետք է ստանան 27 հազար դրամ: Նրանք դժգոհեցին,որ իրենց աշխատավարձն այլ դպրոցների հավաքարարների համեմատ ցածր է: Տնօրեն Լ. Ռեւազյանը հավաքարարներին ասաց, որ նրանց դրույքաչափը ցածր է ավելի մեծ թվով աշակերտներ ունեցող դպրոցների հավաքարարների համեմատ: Սակայն հավաքարարներն առարկեցին, որ դա այդպես չէ: Նրանց խոսքերով`Իջեւանի տարածաշրջանի Լուսահովտի դպրոցն ունի 36 աշակերտ, դպրոցի միակ հավաքարարը ստանում է 62 հազար դրամ աշխատավարձ: Հավաքարարներ Անահիտ Ալիխանյանը, Ամալյա Մանշաթյանն ասացին, որ Սարիգյուղի դպրոցի ներսի տարածքը կազմում է 2350 քառակուսի մետր,որը մաքրելը հեշտ չէ: Դասասենյակների հատակի մանրատախտակը քանդված է, հատակը կարծես ռմբակոծված լինի: Ավագ տարիքի տղաների զուգարանը չի գործում, ուսուցիչների զուգարանում ջուր չկա: Հավաքարարներն ասացին, որ մշտապես ջրի խնդիր ունեցող Սարիգյուղ համայնքի դպրոցում ջրի պակաս կա, զուգարանները մաքրելու համար օգտագործում են երկրորդ հարկի միջանցքի ծորակի ջուրը եւ ջրհորդաններից թափվող ջուր: Նրանք ասացին,որ իրենց աշխատավարձը 20 հազար դրամով կրճատելու փոխարեն հարկ է որոշ չափով կրճատել վարչական հաստիքները: Տնօրեն Լ. Ռեւազյանը հավաքարարներին ասել է, որ եթե նրանք չեն ցանկանում 27 հազար դրամով աշխատել, Սարիգյուղում կան բազմաթիվ կանայք, ովքեր պատրաստ են այդ գումարով հավաքարար աշխատել: Հավաքարարները մեզ հայտնեցին, որ դպրոցի տնօրենն իրենց ասել է, թե դպրոցում կան ոչ մանկավարժ աշխատողներ, որոնց ինքն «ատամներով է պահելու»: Տնօրենը ժխտեց, որ ինքը նման բան է ասել: Անահիտ Էլլարյանի մեկ դրույքից, որը բաղկացած է տնտեսվարի կես դրույքից եւ ցերեկային պահակի կես դրույքից, կրճատման հետեւանքով մնալու է տնտեսվարի կես դրույքի կեսը` 0.25 դրույք: Ա. Էլլարյանը ասում է, որ իր դրույքի կրճատման հետեւանքով իր աշխատավարձը ամսական 15 հազար դրամ է դառնալու: Նա միայնակ կին է, ունի 38 տարեկան, երկրորդ խմբի հաշմանդամ որդի: Անահիտն ասաց, որ դպրոցի տնօրենին խնդրել է իր դրույքը մի քանի ամիս չկրճատել , մինչեւ ինքը կարողանա աշխատանք գտնել, սակայն տնօրենը մերժել է: Տնօրեն Լ. Ռեւազյանն ասաց, որ Անահիտը երկու ամիս ժամանակ է խնդրել բյուլետեն վերցնելու, բուժվելու համար: Դպրոցի բակապահ Աիդա Մանթաշյանի հաստիքը ամբողջովին կրճատվում է: Նա ասաց, որ ինքը հիպերտոնիայով հիվանդ է, աշխատավարձով դեղեր է գնում: Նա մաքրում է դպրոցի բակը, տնօրեն Ռեւազյանն ասաց, որ աշակերտները ամիսը 2 անգամ շաբաթօրյակ են անում, նրանք կմաքրեն դպրոցի բակը: Աիդան իր հաստիքի կրճատման համար բողոքել է Տավուշի մարզպետարանի կրթության,մշակույթի եւ սպորտի վարչություն, վարչության պետ Կարեն Նազարյանն ասել է, որ դպրոցների տնօրեններն իրենք են որոշում, թե ոչ մանկավարժական որ հաստիքները ինչ չափով կրճատեն: Սարիգյուղի դպրոցի աշխատակիցներն ասացին, որ Լ. Ռեւազյանը բացի դպրոցի տնօրենի 180 հազար դրամ ռոճիկից , նաեւ 6 ժամ ինֆորմատիկա է դասավանդում: Լ. Ռեւազյանն ասաց, որ դպրոցի աշխատակիցների մեծամասնությունը իր եւ իր ամուսնու ազգակից բարեկամներն են: Տնօրենի մայրը`65 տարեկան կենսաթոշակառու Ալվարդ Խաչատրյանը դպրոցի ուսմասվարն է, նաեւ շաբաթական 5 ժամ դասավանդում է: Լ. Ռեւազյանն ասաց, որ իր մայրն այս ուսումնական տարվա ավարտից հետո այլեւս դպրոցում չի աշխատելու: Դպրոցի տնօրենը որպես համակարգչային օպերատոր աշխատանքի է ընդունել Նաիրա Քամալյանին, որը դպրոցի կառավարման խորհրդի անդամ է: Լ. Ռեւազյանը 2017թ. հունվարին դպրոցում գործավար է աշխատանքի ընդունել: Տնօրենն ասաց, որ դպրոցում համակարգչային օպերատորի աշխատանքները շատ են, ուստի մեկ անձը չի կարող համատեղել այդ եւ գործավարի աշխատանքները: Դպրոցի հավաքարարները վկայեցին, որ գրադարանավարուհու հաստիքն էլ պետք է կրճատվեր, սակայն վերջինս բողոքելով Տավուշի մարզպետարան` կարողացել է պահպանել այն: Տնօրենը հայտնեց, որ դպրոցի հաշվապահը պահպանելով իր ամբողջական հաստիքը, նաեւ 8 ժամ դասավանդում է`ֆիզիոլոգիական արձակուրդ գնացած մանկավարժի փոխարեն: Դպրոցի տնօրենի աշխատասենյակ եկավ դաստիարակչական աշխատանքների կազմակերպիչ Աիդա Ղարաբեկյանը, որի հաստիքը չի կրճատվելու: Նրան հարցրինք, թե ինչ մասնագիտության ունի: Ասաց, որ մասնագիտությամբ ինժեներ է, սակայն 16 տարի դպրոցում է աշխատում, նախկինում եղել է դպրոցի ջոկատավարը: Նրա խոսքերով`ինքը ակտիվ աշխատող է, վիկտորիաներ է կազմակերպում եւ այլն: Դպրոցի տնօրեն Լ. Ռեւազյանն ասաց, որ ինքը շուրջ 2 տարի ղեկավարում է Սարիգյուղի դպրոցը, աշխատանքներ է կատարել. դպրոցի ճաշարանը նորոգվել է, կաթսայատուն է գործարկվել, ջրահեռացման համակարգ եւ այլն : Նրան հարցրինք դասարանների եւ միջանցքի ավերված հատակի մասին: Տնօրենի խոսքերով` 2017թ. գարնանը ինքը դպրոցը վերանորոգելու խնդրանքով դիմել է Սարիգյուղ այցելած վարչապետ Կարեն Կարապետյանին, նրան նամակ հանձնել: Ռեւազյանն ասաց, որ 2018թ. Սարիգյուղի դպրոցը նորոգվելու է: Ոսկան ՍԱՐԳՍՅԱՆ

Հրապարակվել է։ 22:00 25/01/2018

Մեկնաբանություններ (0)

Առայժմ մեկնաբանություններ չկան

© 2017 - Բոլոր իրավունքները պաշտպանված են: Tesankyun.am կայքի նյութերի օգտագործումն առանց հղման արգելվում է: Նյութի ամբողջական հրապարակումը արգելվում է։ Հրապարակման հեղինակի կարծիքը ոչ միշտ է համընկնում խմբագրության կարծիքի հետ: Գովազդների բովանդակության համար պատասխանատվությունը գովազդատուներինն է:
E-mail: [email protected]
© ՇՈՂԱՐՁԱԿ ՍՊԸ.
Support by CREATEIT.AM